Acara bukber digelar ing salah siji restoran kawasan Hotel Parai Teleng Ria, sawisé sadurungé dilakoni kolaborasi bagi-bagi takjil ing ngarep Makodim, wilayah Penceng, lan perempatan Bapangan.
Sadurungé adzan magrib kumandang, anggota TNI saka Kodim 0801/Pacitan lan para wartawan lungguh santai, klesotan bareng, guyon ngalor-ngidul. Nanging, ing tengah suasana cair kuwi, ana siji pitakonan sing ndadak nggawe wartawan “muk plerak-plerok”.
Salah siji prajurit TNI kanthi polos nyeletuk, “Instansi ngendi wae sing wis ngajak wartawan bukber? Bupati lan Dewan nopo empun?”
Pitakonan kuwi ujug-ujug nggawe sawetara wartawan padha pandang-pandangan. Ana sing mesem, ana sing mung nyengir bingung golek jawaban sing pas. Salah siji wartawan sing jenenge Slamet nganti gligak-gligik, ora langsung mangsuli.
“Ngene ki piye jal lehku jawab,” celetuke lirih, disambut tawa cilik kancane.
Nanging ora suwe, Slamet kaya nemu angin seger. Dheweke krungu kabar yen Polres Pacitan liwat Kapolres AKBP Ayub Diponegoro bakal nggelar buka puasa bareng wartawan dina Selasa (3/3/2026). Spontan Slamet langsung mangsuli kanthi sumringah.
“Alhamdulillah, Kodim lan Polres pancen top markotop,” ujare kanthi nada lega lan girang.
Guyonan ringan kuwi malah dadi warna dhewe ing acara bukber. Ora ana rasa kikuk utawa tegang, sing ana mung suasana kekeluargaan antarane TNI lan insan pers ing Pacitan.
Kegiatan sore kuwi ora mung sebatas buka puasa bareng. Sadurungé, Kodim 0801/Pacitan lan FPPA wis kolaborasi ngabagi takjil marang para pengguna jalan. Aksi sosial kasebut dadi wujud kepedulian marang masyarakat sing lagi nglakoni ibadah puasa.
Kerja sama antarane FPPA, Kodim 0801/Pacitan, lan Polres Pacitan uga dudu pisan iki wae. Sakdurungé wis bola-bali nganakake kegiatan bareng, wiwit saka bakti sosial, resik-resik pantai, nganti kegiatan kemasyarakatan liyane.
Sinergitas antarane aparat keamanan lan insan pers iki dadi bukti yen komunikasi lan kebersamaan bisa njaga kondusivitas wilayah, utamane ing momen bulan suci Ramadhan.
Reporter: S Diran / mediapatriot.co.id Perwakilan Jawa Timur
